सागरगोटे पट कवड्या अन् सापशिडी व्यापार मिळाले

सागरगोटे पट कवड्या अन् सापशिडी व्यापार मिळाले
साधा माळा आवरला तर कसला होतो मूर्ख कळाले
उडलो पडलो झेलत गेलो दान जाहलो गिळला गेलो
राणीचा मी बाग भासलो भायखळ्यावर लुटला गेलो
मरीन लाइन फ्लोरा फौंटन विमानतळ अन् चर्नी रस्ता
ठिकठिकाणी ठरला गेलो जरुरीवरती म्हैंगा सस्ता
तेव्हा तो व्यापार जरा मी शिकलो असतो तर आयुष्या
विनाशिडीचाही मी चढलो असतो वर सरसर आयुष्या
अश्या फेकल्या असत्या कवड्या कोटींमध्ये खेळत असतो
उडवत असतो दुर्दैवाला संधींना मी झेलत असतो
पण सांगू का......??????
पण सांगू का नाळ निरागसतेशी माझी तुटली असती
अब्जाअब्जाच्या भावांची लाखो नाती तुटली असती
चिंता नसती परवाच्या त्या जिवंत उरण्याच्या खर्चाची
चिंता असती 'कुणास सांगावे मी जिवंत आहे' याची
बालपणीच्या खेळामध्ये आयुष्याची शिकवण असते
ज्या ज्या घरास माळा असतो त्या त्या घरास घरपण असते